السيد المهندس / امين غنيم رئيس جهاز القاهره الجديده ..
صباح الخير
حضرتك وعدتنا اكتر من مره ان الرخصه بتاخد في استخراجها 15 يوم لكن لم يحدث ذلك .. والسبب عدم وجود مهندسين ولان بيت الوطن قاربت اقساطه علي الانتهاء فبنلاقي فيه ضغط علي المهندسين في التراخيص والرخصه بتدخل في 5 شهور اقل شئ بالمجمعه العشريه والدفاع المدني مجتمعين .. لكن اللي مش طبيعي خالص ان المهندس بيخلص الرخصه وبعد كتابتها ودفع رسومها بتقعد شهرين ونفضل ندور علي الرخصه وتبدأ الرخصه عند المهندسه رشا اللي كل ما نروحلها تقولك لسه بنراجع ومش فاضيين وعندنا شغل تاني للكمباوند ولو عدي شهر ونص او شهرين تروح عند المهندس حسن الشحات وندور عنده مبنلاقيش الرخص يقولك لا هتلاقيها عند المهندس احمد نوح ونروح عند المهندس احمد نوخ يقولك استحاله انا مبأخرش رخص عندي وبالنهايه نكتشف انها ضاعت فنرجع نكتبها تاني وتبدأ الدوره من جديد وبعد كل ده تروح للمهندسه زينب نائب رئيس الجهاز والست لا تتأخر عن احد وهتلاقيها منين ولا منين ولو لقيناها عند المهندسه زينب واتمضت والحمد لله تروح علي الشيخ عبدالحميد بالاسكانر والشيخ عبدالحميد مصايب الدنيا والدين بتصب عنده وتلاقيه معذور وقاعد لحد تسعه بالليل وعلي ما يخلص حاجتك صعب صعب صعب او الاسكانر عطلان ولو خلصت عند الشيخ عبدالحميد يبعتها للموظفين تحت بالدور الارضي لتسليمها للعميل .. فهل يعقل كل الوقت ده لاصدار رخصه وكتابتها بعد ما المهندس يراجعها ويكتبها وندفع رسومها. !!! اقسم بالله العظيم الموضوع فيه ذل ومهانه وروتين ابن كلب فحرام اللي بيحصل ده .. حرام ان بعد كتابة الرخصه تاخد شهرين يعني بالنهايه الرخصه تعدي الست شهور وفيه رخص بتاخد سنه ليه يا جماعه في عرف مين !! ارجوك يا بشمهندس امين حاول تحل الموضوع الناس تعبت لدرجة التذمر والضجر لان لو حضرتك محلتش كل المسائل دي مين هيخرجنا من الدوامه دي .. شكرا جزيلا

.

وجع قلب اسمه جهاز القاهره الجديده فعلي سبيل المثال الموقف التنفيذي بياخد اكتر من شهرين طيب والرخصه شهرين والمجمعه شهرين نبقي عايزين كل الشهور دي عشان نطلع رخصه !! ليه انشاءالله !! اقسم بالله كانت بتاخد 3 شهور .. انا بتكلم عن معاناه مع كل الشركات والمطورين واصحاب الاراضي .. والكارثه الاكبر انك عشان تنجز كمان لازم تلف علي مكتب مكتب عشان تخلص حاجتك والنهارده فلان اجازه وبعده فلانه مش موجوده لا ده عنده اجتماع ولما بنتكلم وننقد الناس بتزعل طيب الحل ايه !! اقسم بالله تعبنا والكارثه المرظف هوا كمان تعبان وفيه نقص بالموظفين والاماكن لا تكفي لاستيعابهم فالمنظومه ماشيه ببركة سيدي ابو الدردار .. واصبح علي المهندس أمين واقوله الجهاز زي الفل وروعه وكله سيكوريت من بره .. ?

.