صباح الخير ويوم سعيد عليكم جميعا ..
بعدما فشلت هيئه المجتمعات العمرانيه في فكره تجميع اجهزة القاهره الجديده وتجمعاتها في مبني واحد مجهز وحديث وعصري كان ولابد التطرق والحديث عما يدور ويحدث هناك .. فتعالو نلقي الضوء ونستطلع ما يحدث لنبحث عن حلول لمشاكل عالقه وزحام غير طبيعي وروتين معقد وتعطيل لمصالح العامه لنقف علي حقيقة الموقف والي اين نحن ذاهبون فقد يستمع الينا المسؤلون ونجد حلولا لايقاف هذه المهزله .. وسنرسل الي المهندس امين غنيم يوميا ما يحدث من سلبيات وايجابيات عله يري ويسمع ما يحدث ولا يستطيع احدا من موظفيه ايصاله اليه .. وهنتكلم النهارده اولي هذه المشاكل ..
1- صالة الاستقبال بالدور الارضي .. عايز اعرف ازاي المصمم فكر انه يجمع جميع الاجهزه في صاله واحده ازاي !! هل باعتقاده انهم حاطين سيستم وبالدور وبالارقام !! واننا في اوروبا والناس هتنتظم ويكون عندها وعي وهنشتغل بالدور كنظام عصري منظم !! اعتقد فشلت الفكره لان الصاله لا تكفي لهذا العدد والكم المهول من البشر مع العلم ان تقسيم الصاله الي اجزاء كما هو موجود الان لم يكن موجود بالاساس لكنها من فكر الموظفين وكل واحد اخد قسم وفضل يفصل فيه علي كيفه .. فعمت الفوضي بهذا المكان والعشوائيه وانا علي يقين بوجود اصابات يوميه بالكرونا وعدوي بسبب ما يحدث .. ازاي يا ناس كان كل جهاز بموظفيه في صاله واحده مع كل الاجهزه والموضوع بقي سمك لبن تمر هندي ازاي !! فهل سنجد حلولا او نبحث عنها!! ولماذا لا نستخدم المباني القديمه مره ثانيه للتخفيف والحد من هذا الزحام وعدم الانجاز عشان نلغي حكاية الطوايير وحتي بتيجي الساعه 3 والطابور لا ينتهي ويؤجل لتاني يوم ..
2- بيت الوطن وما يحدث فيه .. فبعد ان كان بالمبني القديم مكان رحب يتسع للحاجزين واصحاب الاراضي اصبح بالمبني الجديد صندوقا لاربعه شبابيك او خمسه لا تكفي لان يجلس الموظفين بالداخل جنبا الي جنب ولا يكفي هذا العدد من الموظفين لاستيعاب هذا الكم من الطلبات اليوميه خاصة ان المهله لاستلام الاراضي قاربت علي الانتهاء والكل عمال يجري ويعمل رخصته ويدفع اقساطه .. وهل يعلم المهندس امين غنيم ان القادم كله لبيت الوطن في السنوات القادمه !! ليخصص لهم علبة سلمون او صندوق ليتكدسو فيه بهذا الشكل !! وحاجه مهمه تانيه هل يعلم ان بيت الوطن بالدولار هو تقريبا يمثل منه 75% بالدولار من اجمالي الاراضي والباقي بالمصري 25% فقط !! فكيف لهذا المكان ان يستوعب هذا العدد لابد من وجود عدد اخر من الموظفين لاستيعاب الحاصل ..
اما بقي حكاية موظفين هذا القسم ( بيت الوطن بالدولار ) دي حكايه تانيه زي قصص الف ليله وليله فكل واحد فيهم مش طايق نفسه او عايز يقدم طلب نقل او جاله الضغط بسبب ما يحدث بعد ان اصبح كالريبوت تدوس علي الزرار يشتغل بيانات صلاحيه وتغير الزرار يستلم بوكسات او موقف تنفيذي عشان كده كله عايز يهرب من المكان ده .. والوضع اصبح ( كابوسا ) مع الاعتذار للاستاذ احمد كابوس ? .. اما بقي حكاية استلام البوكسات للتراخيص ده فيلم تاني وضغط رهيب علي العملاء فالموظف يقولك بوكس واحد هيستلم ..طب ازاي يعني معايا 20 بوكس اجيلك علي عشرين يوم !! عشان اسلم اليوكسات !! طب ذنب الناس ايه !! طيب هنستلم البوكسات وهنوزعها علي المهندسين طيب دول اتنين فقط لا غير نولع فيهم مثلا عشان يشتغلو هذا الكم !! والوش التاني للعمله ذنب العميل ايه او ايه اللي يخليني اخد موعد بالشهور عشان رخصتي تتراجع او بمعني اخر عشان استخرج رخصه اقعد اجري ورا الجهاز وموظفيه سنه !! عشان اطلع رخصه !! طيب ادو الناس مهله سنه لاستخراج الرخصه وتحسب المده من مهلة البناء .. والله ايدي وجعتني من الكتابه علي الموبيل وكفايه كده النهارده وسنسرد ما يحدث يوميا بأذن الله لكن الحل ايه !! وعلي قدر فكري وعقلي اقترح علي رئيس الجهاز انه يقضي ساعه يوميا بالصاله تحت ويشوف بعينيه ما يحدث ويفكر يحل زي ما بيلف بدري كل يوم بالشوارع والاحياء لاكتشاف مصايب الاحياء فادينا زيهم ساعه بالصاله تحت وشوف فيمكن نلاقي حلول ويا مسهل .. وبكره بقي هنكتب علي قسم التراخيص والمواقف التنفيذيه وبيانات الصلاحيه وما يحدث فيها ودول هم سرطان جهاز القاهره الجديده بالذات والكتابه عنهم عايزه اسابيع او شهور زي علاج السرطان كده بيطول وربنا يعافيكم من السرطانين اللهم امين .. وصباح مشرق باذن الله قد نجد معه حلولا لما يحدث …صباح الخير .

.

السيد المهندس / امين غنيم رئيس جهاز القاهره الجديده ..
صباح الخير
حضرتك وعدتنا اكتر من مره ان الرخصه بتاخد في استخراجها 15 يوم لكن لم يحدث ذلك .. والسبب عدم وجود مهندسين ولان بيت الوطن قاربت اقساطه علي الانتهاء فبنلاقي فيه ضغط علي المهندسين في التراخيص والرخصه بتدخل في 5 شهور اقل شئ بالمجمعه العشريه والدفاع المدني مجتمعين .. لكن اللي مش طبيعي خالص ان المهندس بيخلص الرخصه وبعد كتابتها ودفع رسومها بتقعد شهرين ونفضل ندور علي الرخصه وتبدأ الرخصه عند المهندسه رشا اللي كل ما نروحلها تقولك لسه بنراجع ومش فاضيين وعندنا شغل تاني للكمباوند ولو عدي شهر ونص او شهرين تروح عند المهندس حسن الشحات وندور عنده مبنلاقيش الرخص يقولك لا هتلاقيها عند المهندس احمد نوح ونروح عند المهندس احمد نوخ يقولك استحاله انا مبأخرش رخص عندي وبالنهايه نكتشف انها ضاعت فنرجع نكتبها تاني وتبدأ الدوره من جديد وبعد كل ده تروح للمهندسه زينب نائب رئيس الجهاز والست لا تتأخر عن احد وهتلاقيها منين ولا منين ولو لقيناها عند المهندسه زينب واتمضت والحمد لله تروح علي الشيخ عبدالحميد بالاسكانر والشيخ عبدالحميد مصايب الدنيا والدين بتصب عنده وتلاقيه معذور وقاعد لحد تسعه بالليل وعلي ما يخلص حاجتك صعب صعب صعب او الاسكانر عطلان ولو خلصت عند الشيخ عبدالحميد يبعتها للموظفين تحت بالدور الارضي لتسليمها للعميل .. فهل يعقل كل الوقت ده لاصدار رخصه وكتابتها بعد ما المهندس يراجعها ويكتبها وندفع رسومها. !!! اقسم بالله العظيم الموضوع فيه ذل ومهانه وروتين ابن كلب فحرام اللي بيحصل ده .. حرام ان بعد كتابة الرخصه تاخد شهرين يعني بالنهايه الرخصه تعدي الست شهور وفيه رخص بتاخد سنه ليه يا جماعه في عرف مين !! ارجوك يا بشمهندس امين حاول تحل الموضوع الناس تعبت لدرجة التذمر والضجر لان لو حضرتك محلتش كل المسائل دي مين هيخرجنا من الدوامه دي .. شكرا جزيلا

.