الى هيئة المجتمعات العمرانية الجديدة
حضراتكم لما طرحتم مشروع بيت الوطن لأول مرة فى ٢٠١١ كان يندرج تحت قانون الاستثمار .. يعنى بالمعنى البلدى كده بتقولوا للمغترب ( احنا هنديك أراضى تكسب من وراها و تستثمر فلوسك فيها فى مقابل تدفعلنا ثمن الأراضى دى بالدولار علشان البلد تستفيد و انت كمان تستفيد )
و الدليل على كده انكم سمحتوا للحاجزين بحجز ٣ قطع فى كل مدينة لكل حاجز عند مقدرته
ده معنى المشروع باختصار شديد جدا
و من سنة ٢٠١١ لحد النهاردة و فى خلال ال ٨ مراحل السابقة بدأتم فى التخبط .. شوية بطرح أراضى غير مميزة اطلاقا لا تناسب المعنى الحقيقى للمشروع .. و شوية بالتغيير و التلاعب فى الاشتراطات .. و شوية بالتضييق على ملاك المراحل السابقة بعدم عمل توكيلات بالسفارات حتى فقد الحاجزين الثقة فيكم خصوصا انكم من المرحلة السادسة بدأتوا فى النظر إلى مصلحة الهيئة فقط و ضاربين بعرض الحائط مصلحة المغترب و اصبح شغلكم الشاغل ( ازاى نرمى الصنارة علشان نجيب اكبر كم من الحوالات الدولارية و بعدين نضحك على الحاجزين بفتح مواقع جديدة غير مميزة على الاطلاق )
عدم الثقة فيكم عند الحاجزين هى السمة السائدة حاليا و هى ليست وليدة اللحظة و لكنها هى تراكمات حدثت منذ المرحلة الخامسة التكميلية حتى الآن
بالامس تم طرح كراسة الشروط للمرحلة التاسعة لعدد قليل جدا من الأراضى على مستوى الجمهورية و المميز فيهم لا يتجاوز ال ١٠٠ قطعة أرض و المهتمين متخوفين من هذا العدد و قلة الأراضى المميزة
و بناءا عليه ..
١ – الرجاء فتح مواقع مميزة للمهتمين بأعداد كبيرة .
٢ – مراعاة التسعير و عدم المبالغة فيه لتخوف المهتمين من الكساد القادم الذى يعقب التضخم الحالى .
٣ – الرجوع الى نظام سداد الاقساط على ٥ سنوات بدلا من ٣ التى طبقتوها على الحاجزين فى تكميلية المرحلة السابقة .
٤ – تثبيت الفائدة كما كان فى السابق على ٣,٥٪ على الاقساط بدلا من ( افتكاسة ) المرحلة الثامنة التكميلية .
اذا راعيتم هذه النقاط فى الاشتراطات ستضمنوا كم كبير جدا فى التحويلات حتى تكون المصلحة مشتركة بينكم و بين المهتمين .. غير ذلك سيفشل المشروع و لن تحققوا الهدف منه
تحياتى لحضراتكم و لكل المهتمين ?
