صباح الخير ..
لما نشرنا فيديوهات وعرضنا واتكلمنا علي شقق جنه بجميع المدن اللي هي القاهره الجديده وزايد واكتوبر ودمياط والمنصوره الجديده وسكن مصر بالعلمين كان الهدف الرئيسي منها وقلت الكلام ده مليون مره ان يا جماعه اللي محتاج سكن له او لابنه او ملوش سكن بالقاهره او اكتوبر او زايد فالموضوع فرصه لان الشقق جاهزه والاماكن دي مسكونه ومعموره وكلامنا كان للشريحه دي من الناس وغير موجه للتجار من المغتربين اللي بيدور علي اوفر واللي اصبح شغلانته الاراضي والشقق فده خارج نطاق كلامي نهائيا… لذلك تمت مخاطبة الوزاره ومخاطبة الدكتور وليد المحترم بأن يعيد فتح هذه الشقق والاماكن للمغتربين مره تانيه خاصة وان الاماكن دي موجوده من قبل ولم يكن هناك اقبالا عليها والحمد لله الناس وافقت وتم اعادة فتحها مره اخري للي عايز وقولنا برضو سعرها عالي شويه بس طالما ضمن المرحله الثامنه وتوابعها هنقول ماشي وقبل ما يتم فتح المرحله التاسعه يعني دي مش طرح دي استكمال الا بقي لو الوزاره ليها رأي تاني تبقي مصيبه ولما بنقول ليها رأي تاني يعني لجان التسعير بالوزاره اول ما هيطرحو المرحله التاسعه هيقولك نغير السعر وطبعا دول ملهمش دعوه كل همه يزود وبس ومش مهم السعر عادل ام لا لكن كل همه انه لا يحاسب رقابيا فالباشا بيخبط سعر وخلاص فيه بقي اقبال او مفيش ملوش دعوه هوا بأمان وبياخد مرتبه وزي الفل ومحدش هيحاسبه رقابيا .. لكن نصيحتي ليهم يفكرو شويه بعقل وتروي ودراسه لان البلد محتاجه كل دولار اه والله كل دولار فعلا.. وكل الطروحات دي بالدولار ولا تقارن بما يعرض بالداخل فلو حضرتك فكرت شويه هتفهم ان فيه فرق كبير ان دخلك يكون بالدولار او بالعمله المحليه .. يا رب الناس تفهم وتعي من اجل مصلحة البلد ومن اجل مصلحة الناس ايضا ورجاء من المهندس الدكتور / وليد عباس بدراسة الامر مع المسؤلين .. وصباح مشرق باذن الله وفيه خير لمصرنا الحبيبه اولا ولنا ثانية .. شكرا
